1985eko otsailaren 19a, gure herriaren historia beltzean iltzatuta geratu den data. Goiz hotz eta lainotsu hartan jazo zen Euskal Herriko hegazkin ezbehar larriena: Oiz mendiaren hondamendia.
Inauterietako astearte hartan, Madrildik arazo barik aireratu zen Boeing 727 bat, «Alhambra de Granada» izenarekin bataiatu zutena. 08:47an ekin zion bideari, 141 bidaiari eta tripulazioko 7 lagun zeramatzala. 09:35ean zen Bilboko aireportuan lur hartzekoa. Hamar minutu lehenago, Sondikako dorreak aireportura hurbiltzeko maniobra egiteko baimena eman zion komandanteari. Une horretatik aurrera gertatu zirenak eragin zuten zorigaiztoko istripua. Orduan hasi zen amesgaiztoa.
Hegazkina zegokiona baino 300 metro beherago zihoala, Oiz mendian zegoen ETBko antena baten kontra jo zuen ezker hegalak. Kolpearen ondorioz, ipar-ekialdeko hegalaren kontra amildu zen aparatua, abiada bizian (300 km/h), kilometroko eremuan zulo erraldoia utzita. Motorrek eztanda egin zuten eta hegazkina burdin kiskali eta bihurritu mordo bat eginda geratu zen.
Istripuaren lekura heldu ziren aurrenekoek irudi ikaragarria izan zuten begi aurrean:148 biktimen gorpuak bi kilometroko eremuan barreiatuta. Hilotz bakarra topatu zuten osorik hilerri beldurgarri hartan: hegazkinaren sotoan hilkutxan zeramaten zerraldo batekoa.
Istripua zerk eragin zuen argitzeko orduan, espekulazioa izan zen nagusi hasiera batean:ETAren atentatua izan zitekeela ere esan zen (garaiko agintari andana zihoazen hegazkinean), baina gerora egin zen ikerketak giza akatsak eragindako istripua izan zela ondorioztatu zuen. Hegazkinaren pilotuek gutxieneko altitudearen alerta sisteman gehiegizko konfiantza izan eta altimetroa txarto irakurri zutela ebatzi zuten ikertzaileek.
www.eitb.eus & www.diariovasco.com
